Baráttan gegn dauðanum

Berlín

2007-08-05T12:28:00.000-07:00

Við gistum í litlu Hosteli í Austur Berlín. Okkur tókst að klára Berlín á 2 dögum, fáránleg keyrsla, fáránlega mikill bjór og fjölþjóðlegur matur, spænskur, thaílenskur og að sjálfsögðu þýskur. Fyrri daginn gengum við um, götur og stræti, fórum á safn, eitt af fáum í ferðinni og enduðum í bátsferð sem byrjaði vel, svo kólnaði skyndilega og fór að rigna. Enduðum svo á Thai stað eftir miklar umræður. Gengum þá í litlu IKEA íbúðina sem við bjuggum í, höfðum fjárfest í 6L af eðal-þýskbjór fyrr um daginn sem kostaði 350 kr, eðal rauðvínflösku á 200 kr og morgunmat fyrir fjóra á ca. 800 kr til tveggja daga neyslu. Berlín kom þægilega á óvart hvað stemmara og verð varðar. Þetta kvöld urðu samræður okkar hvað heitastar, 3 klst umræður um skiptingu ríkisvalds og að sjálfsögu var lokaniðurstaðan að við værum sammála um að vera ósammála. Næsta dag vöknuðum við "snemma" en vorum komin út á gangstétt um hádegisbil. U-Bahn, spásseringar um götur og stræti, eitt lítið listasafn og svo frábær hjólatúr með bandarískum guide sem Jóel tók mjög margar myndir af, jaðrar við áráttuhegðun.

Eitt það erfiðasta við ferðina var að velja matsölustaði. Fjórir svangir einstaklingar með mismunand smekk. Hvað þá að vera svangur á sama tíma og aðrir samferðalangar. Ég veit ekki hve miklum tíma við eyddum í að ákveða hvað við ætlum að borða, hvað þá skipta reikningnum niður í fjóra jafna hluta. Já við fengum mörg einkennileg augntillit eða gotur frá þjónum og kokkum, nokkrar ágætissögur sem hægt er að segja frá útborðunum okkar.

Það brá á rigningu í hjólaferðinni okkar, hér stendur Elín á miðjum múrnum við Checkpoint Charlie.

Veðrir mun betra, Pósun fyrir framan Þinghúsið í Berlín

Thaímatur í Au-Berlín

Valentínus að sýna okkur Humarinn í sjáfarréttarsúpunni á spænskum veitingastað, kosinn besta súpa ferðarinnar.

Hauptbahnhof við Berlínarkomu.

Hauptbahnhof að morgni, upphaf lestarferðar til Kraká, þið sjáið Berlínarglottið á andlitum okkar.

góð heimferð, vondur magi

2007-07-31T15:10:00.000-07:00

Nú erum við elín komin heim. Valli og Jóel líka komnir heim að öllum líkindum nema jóel hafi tapað áttum á leiðinni úr bílnum okkar að hurðinni heima sér eða Valli hafi ílengst í Hafnafirði þegar hann var að keyra heim, dottið inn á einn af þessum 20 KFC stöðum sem eru komnir þar upp og ekki viljað fara þaðan, kannski bara keypt sér íbúð.

Ég vil byrja á að segja að ferðin var góð, strembin á köflum en afar skemmtileg.

bráðlega byrjar revidering í réttri röð á ferðinni ásamt myndum og fleiru. En ég vil bara segja öllum sem ætla að flýja land að fara beint til Rúmeníu, Transylvaníu eða bara Istanbúl, Metropolis Hostel , Hostel sem er betra en öll þau Hótel sem ég hef komið á.
Ekki fara til Bucharest, ekki vera of lengi í Búdapest, farðu að versla í Kraká og borðaðu allt mögulegt í Istanbúl en ég get lofað þér magakveisu sem er næstum þess virði því maturinn er á köflum sjúklega góður.

Moszkva ter

2007-07-17T07:20:00.000-07:00

All nokkrir samferdalangar minir eru bunir med allt hreint tau, naerbuksur, sokka, boli og buksur. Fyrst voru nyjar flikur keyptar i stad skitugra en thad gengur ekki til lengdar, thad er erfitt ad henda fotum i godu astandi. Mu er onnur umferd i gangi hvad notkun fata vardar.
Eg er svo faranlega snjall og nettur ad hafa thvegid naer allt dotid mitt um daginn og lykta thvi eins og starfsmadur LUSH verslunar eftir langan vinnudag (sma sviti en samt svona god mykingarefnislykt). Bakpokinn minn er sneisafullur af hreinum fotum og gossi sem eg er buinn ad kaupa. Bakpokinn minn er tho ekki jafm thungur og pokinn hennar elinar, hun neitar ad henda doti en er buin ad fara i budir oftar en einu sinni. Bakpokinn minn og eg (lika elin, valli og joel) erum ad fara til rumeniu i nott i sex manna klefa i 34 stiga hita. 12 lestarferd sem eg vona ad endi vel. Verdum thvi komin til Sibiu, Transylvaniu, Rumeniu a morgun klukkan 11 til ad borda kjot steikt i smjori med beikoni og djupsteiktum pylsum, skoda kastala, sja kindur, gista i stofunni hja baendafolki, fara i fjallgongur og drekka heimabruggad vin. Kannski til ad thvo fot.

Elin ad kaupa kaupa kaupa, jafnvel gjof handa ther

Fullt ad kastolum, thessi er 50ara gamall og gerdur i 4 mism. bygg.stilum.

Fallegt utsyni fra buda yfir pest

Joel hatar ekki ad taka myndir, elin tok mynd af mer takandi mynd af honum ad taka mynd

Valentinus (tin tin) pinir ekki svita og solarvorn a sig a heitri stund i Operunni

Gamli og nyji timinn i Budapest

Af hverju sleppa their ekki thessu veseni ad steinleggja allar gotur og bara malbika?

Pfaff, nett mynd af nettu folki a nettum gangi i skitugum og blautum fotum. Er valli nogu vel klaeddur fyrir myndina?

Hurrandi stor sundlaug a fljotandi heitum degi, 22 sundlaugar/heitapottar a sama stad og kamillugufubad. Laumumynd, thad var bannad ad taka myndir tharna

vid fundum tyrkneskan stad i budapest, til ad hita okkur upp fyrir rauntyrkland. Valli er ad drekka absinth og eg ad reykja mold, nei valli ad drekka bjor og eg ad reykja vatnspipu med lime bragdi.

Elin ad vera Elin

Dumpling

2007-07-12T10:49:00.000-07:00

Thad var agaetis vedur thegar vid stigum ur lestinni i Krakow. Borgin er jafn falleg minningunni fra thvi eg kom hingad sidast fyrir 6 arum. Fyrir sex arum var eg yngri og vitlausari, i felagi med Gudmundi Latus, Oskari Boogie og Hrafni H. Thad var god ferd og flippud. Nu samanstendur hopurinn af Elinu Mar., Valentinusi Tin Tin og Jolla Joel.

Hroaskelda: Blautari en sjomannsvettlingur a hond 18. aldar sjosoknarmanns i farvidri, blautari en sogupersonur Thomas Mann a godu fyllerii.

Tjoldudum klukkan 22:00 a fimmtudegi, misstum af Bjork, hlustudum a Arcade Fire. Vaknadi thyrstari en andskotinn, blautari en thegar eg for ad sofa, threyttari en eftir 17 klst. naeturvakt og algjorlega fokked.
Forum til Koben klukkan 5:00 um morguninn, thetta var 3 nottin i rod sem eg svaf minna en 4 klst. Fengum gistingu i Koben fyrir einskaera heppni. Svafum til klukkan 17:00 og forum svo a gott jamm i koben, gatum ekki farid aftur thvi allt dotid var bara einfaldlega of blauttt. Allir passarnir okkar blotnudu og baekur eydilogdust.

Hittum Kristinu Mariu og Brodir hennar fyrir utan tonleika og skelltum okkur saman a Talib Kweli, full, en samt meira blaut.

Forum aftur a Hroa a laugardeginum, tha var nu annad hljod i vedrinu, en drulluna vantadi samt ekki.

A sunnudeginum endudum vid svo a ad taka lest klukkan 14:00 um daginn til Berlin, thad voru allar naeturlestir fullar naestu daga, lyktin a Hroa var lika thad ogedsleg, asamt fotum okkar og lidan ad vid slepptum sunnudeginum. Endudum a Hauptbanhof i Berlin um kvoldid og endudum i frabaerri ibud a godu hosteli i Austur Berlin.

útferð og fyrirferð (pus et tumor)

2007-07-03T11:48:00.000-07:00

Það styttist í rennblauta útferð mína til Hróaskeldu í Danmörku, þar sem konungsfólkið þarlendis er gift og grafið. Að þessari fyrirferð lokinni, áðurnefndri útferð, stíg ég í annan fótinn og lestir, ferðast þannig Austur Evrópu.

Áður fyrr talaði fólk um fiðring í maganum þegar eitthvað spennandi var framundan. Skildi þetta er ekki fyrr en nú, frí eftir 38 klst og ég með stórtæka vindverki.

Hreinsa til í skápnum

2007-06-27T13:06:00.000-07:00

Það er lífgandi að vera í vinnu þar sem tilfinningin um að maður sé að gera gagn kemur upp annað slagið. Taka blóð, gefa blóð, skrifa upp á lyf, hlusta lungu hér og þar, hlusta á hjarta, gera (horfa) mænuástungu, taka mergsýni, panta rannsóknir og meta niðurstöður og hringja í sérfræðing þegar maður telur sig vita nóg um tilfellið til að ræða málin.

Ég er umkringdur gravid og nýléttari konum eða verðandi feðrum, allir komnir í fasta vinnu og með föst laun og það er mega flame að komast út úr bænum eina helgi, tjalda, grilla og ganga, áður en næsta vinnugeðveiki byrjar, það flippaðasta sem ég hef gert í sumar.

Nei ég er ekki að verða faðir, ég hef enn ekki komist það langt í mínum þankagangi. Það komast fæstir það langt í skipulagningu, nema áráttu-þráhyggjuröskunar einstaklingar. Mín tilfinning. Þetta gerist í miklum meiri hluta óvænt, svona hei, ekki planað en ókei, töff.

Annars er þessi maður ekki enn orðinn faðir að minni bestu vitund, enda lifir hann stóðlífi og er stórdrykkjumaður þessa dagana.

Svo er annar háðsfugl sem ég þekki nokk vel farinn að deita, nefni engin nöfn. Er svona athuga málin og hættir hann nú vonandi að tala um stelpur og hvað lífið þýði í raun og veru. Nú getur hann farið að telja dagana í að verða foreldri.

Þetta er nú meira lánið

2007-06-12T14:32:00.000-07:00

Nú er tími til að fá sér lán. Lán til þess að geta skitið peningum í smá tíma. Alltaf þótt orðatiltækið eiga vel við. Bankinn sér svo um að skeina mér. Ég vona að bankinn noti svona klósettappír með hvolpinum á, ekki professional frá Lotus sem er fyrir fyrirtæki og alls ekki endurunninn því útbrot eru algeng afleiðing notkunar.

Því miður tala staðreyndirnar öðru máli. Lánþegi fær að skeina þig með lífslangri skuld, skuld sem er stærri og lengri en listinn yfir öll þau mannréttindabrot sem Ríkisstjórn Kína hefur framið á þegnum sínum eftir valdatöku kommúnista. Bankinn eignast þig, nema þú vinnir 10 klst á dag og líka um helgar. Færð ekki að vera mikið í íbúðinni sem þú varst að fjárfesta í.

Stéttin fyrir utan íbúðina sem þú keyptir á 90% láni eða yfir mun á endanum sjá um að skeina þig því bankinn tók íbúðina og aðrar eignir upp í skuldina. Skuldin/lánið hljómaði ekki hátt á sínum tíma en það gleymdist að athuga með vexti, verðtryggingu og öll þau gjöld sem bætast við þegar ætlað er að borga stóran hluta af láninu í einu eða borga lánið með nýju sem hefur lægri vexti og minni kvaðir. Bankarnir eru langstærstu fasteignaeigendurnir á Íslandi, svipar óneitanlega til kirkjunnar fyrr á tímum. Selja ekkert til að halda framboði og eftirspurn jöfnu.

Lesandi kær, bankar á Íslandi sem og annars staðar eru ekki alvondir að mínu mati. Ég á bara til með gleyma mér, ranka við mér í miðri litríkri og hýrri auglýsingu frá Glitni, KB, BYR, SPRON eða Landsbankanum, hugsandi að bankarnir hér á Íslandi séu einskonar góðgerðarfélög og séu með bara allt á sanngjörnum kaupum og kjörum. Ekki eru margir sem fengu lán hjá þessum bönkum jafn skælbrosandi og fólkið í auglýsingunum. Það kostar að taka lán. Bankar eru einkareknir og þurfa að skila hagnaði. Ekki halda að þú sért að fá eitthvað af þessum gróða sem bankar landsins eru að sýna í dag. Lesandi góður, ekki gleyma þér og ranka við þér á stéttinni fyrir utan húsið þitt þegar of seint er í rassinn gripið og klíníngurinn kominn út um allt. Suma klíninga er ekki hægt að skeina.

Íbúðin

2007-06-10T09:00:00.000-07:00

Þetta er magnað. Ég bý víst í afar fínni íbúð. Laugardalurinn er 50 m í burtu, kaupmaðurinn á horninu er í 40 skrefa fjarlægð. Ég hef ekki verið í íbúðinni minni svo megi teljast í fleiri mánuði. Í 4 mánuði hef ég farið héðan út fyrir kl. 8:00 og ekki komið aftur fyrr en eftir kl. 23:00.
Ég er búinn að eyða heilum 2 dögum í íbúðinni minni án þess að gera neitt uppbyggjandi. Það sem er hægt að gera í íbúðinni:
1)Elda mat, borða mat. Ég er búinn að borða 7,2 kg af öllu mögulegu um helgina. Grilla, steikja, baka, sjóða, bræða. Fjárfesti í svínakjöti á föstudaginn sem var svo brimsalt að augun á mér skruppu saman inn í augtóftina og munnurinn á mér krapp saman svo ég neyddist til að þræða magasondu um nefið á mér og halda vel að mér vökva í 2 klst til að geta séð aftur og opnað munninn.
2) Búa til kaffi, tvöfaldan, þrefaldan espresso.
3) Spila á píanóið, heví jass, mega Bach, Grieg.
4) Drekka bjór, brugga bjór, 25 lítrar af bjór eftir 3 vikur.
5) Horfa á allar 8 myndirnar mínar upp á vegg sem eru ljósteknar (framkallaðar), málaðar, grafíkaðar og prentaðar.
6) Horfa á alla þættina sem ég fæ lánaða hjá fjölskyldunni fyrir ofan, The Young Ones, Peep show og The League og Gentlemen.
7) Lesa bækur, lesa og lesa eitthvað sem tengist námi á engan hátt. Ég er kominn með á leigu og í láni 9 bækur sem mig hefur lengi langað að lesa en ég er ekki enn byrjaður á þeim, það er auðveldara að horfa á sjónvarpið.
8) Fara í öll fötin sem maður á fyrir framan spegil og spá í hvað passi við hattinn sem ég á.
9) Sofa, sofa út, sofa lengi, sofa fullur og vakna þunnur.
10) Nudda á sér ennið og hugsa með hryllingi til áfengisins sem var drukkið daginn áður.
11) Fara í langa, langa sturu, fara á klósettið með hurðina opna (elín er á kvöldvöktum og því ekki heima á kvöldin)
12) Hlusta á tónlist, alla geisladiskana sem ég hef fjárfest í síðastliðin fjögur ár og tónlistina sem ég hef ekki fjárfest í (fengið lánaða hjá vinum, vandamönnum og bókasafni þ.e.a.s.).
13) Sippa í stofunni
14) Borða CHEERIOS með AB mjólk....... Nei lesandi góður nú hef ég gengið of langt í upptalningum mínum, farinn of fjarri glansandi gljálífi æskunnar, ég er farinn að tala um hluti sem ég geri dags daglega, til að komast af, teljandi upp kaldan og blautan raunveruleikann eins og hann sé skrifanna verður.

Ekki skal kvíða næstu rimmu við raunveruleikann, 11. til 23. júní. Lesendur góðir, ég verð á vakt næstu helgi. Endar svo vinnurimman með fimm næturvöktum, fimm sautján tíma vöktum á sjúkrahúsinu við Hringbraut. Ég er kominn úr silkihönskunum í leðurgrifflur með smellum til að festa á hvítan sloppinn, tilbúinn til að glíma við veruleikann næstu tólf dagana.

Tímatafla

2007-06-07T13:36:00.001-07:00

Félagar, það hefur ýmislegt gerst upp á síðkastið. Ég er loksins farinn að skynja sjálfan mig og umhverfið aftur en sú framþróun tekur afar langan tíma. Í töluverðan tíma hef ég nú verið á einstefnuleið að einhverjum punkt sem ég var hættur að geta skilgreint. Skv. gömlu skilgreiningunni á ég að hafa náð þessum punkti, en ég get ekki samþykkt það. Aldrei sem fyrr er ég leitandi, reyni að hafa uppi á sjálfum mér, sjá hvort að ég þekki enn eitthvað af þessu fólki sem hefur verið mér samferða í gegnum tíðina. Ég er óneytanlega orðinn sjálfum mér mjög fjarlægur, ég þekki mig vart lengur.

Sumarið að renna í hlað í þessum skrifuðu orðum. Úrslitaviðureignin í NBA er hafin. Nýr heilbrigðisráðherra lofar erminni á jakkanum sínum, ráðherrar eru hættir að lofa upp í ermina á sér, gefa hana frekar alla.
Það eru margir veikir einstaklingar á spítalanum. Ég fór næstum því að hlæja þegar einn hjúkrunarfræðingurinn spurði mig hvað ætti að gera varðandi einn skjólstæðinginn. Hvað er hún að spyrja mig? Á ég að vita eitthvað um þetta málefni, ég er bara búinn að vinna sem læknanema-deildarlæknis-ígildi í fjóra daga. Ég var að klára próf fyrir fjórða ár í læknisfræði og það stóð ekkert um þetta í námsefninu. Annars kláraði ég mig vel, tók á þessu af akademískri ró, gerði rétta hluti í réttri röð: hringdi á "hinn" deildarlækninn á teyminu.

Eftir á

2007-05-30T05:58:00.000-07:00

Það hefur lítið breyst síðan Berlínarmúrinn féll, austan tjaldsins. Það mun lítið breytast þegar ég klára prófin á morgun. Ég er svipaður Kommunum og mafíunni, er ekki fyrir miklar breytingar.

Ég hef því hug á að gerast Beatnik milli vakta á LSH, labba um götur bæjarins í lörfum, redda mér ókeypis fari hingað og þangað, kaupa ódýrt kaffi þar sem áfylling fylgir með, reykja sígó, úti á götu en ekki inni, og revidera í Allen Ginsberg og tala um Kerouac eins og hann væri besti vinur minn, lesa ljóð upphátt fyrir utan Apótekið á Austurstræti, vera alltaf með viskífleyg innan klæða og vera alltaf með hatt. Þá enda ég í Berlin 10. júlí eftir góða viðveru á Hróaskeldu og hristi hausinn yfir ástandinu austan við múrinn, les upp ljóð, set hattinn á mig og geng burt með bakið blasandi við heimssögunni, beint í fasið á Sumarinu 2007.

óvissuferðir og pizzur

2007-05-24T11:37:00.000-07:00

Þegar prófið var að skella á áttaði ég mig á því að ég hef aldrei verið jafn líkamlega stressaður, ég var autt blað, gat ekki rifjað upp stakan staf.
Það rifjaðist upp fyrir mér að ég vaknaði þrisvar í nótt í svitabaði. Eitt skiptið dreymdi mig að í staðinn fyrir borð með prófi hafi verið ákveðið að koma fólki á óvart með pizzaveislu og óvissuferð.
Það voru engar pizzur þegar ég mætti í aðalbyggingu HÍ í morgun klukkan 8:57.
Ég neyddist til að svara 150 krossaspurningum og kreista úr mér alla þá þekkingu sem ég inniheld um hjartabilun, hyperkalsemiu (of hátt Kalsíum) og langvinna nýrnabilun.

Þegar lestur brestur á

2007-05-22T04:54:00.002-07:00

Nú er stóllinn sem ég sit í búinn að fá nóg af mér og neitar að ljá mér sæti. Þannig er mál með vexti að stóllinn hefur fengið yfir sig nóg af mér og mínum buksum. Ég hef setið í stólnum nú í gott 6 vikur alla daga a.m.k. 6 klst á dag og mest 14 klst. Þegar ég kom í morgun til að setjast í stólinn var hann búinn að æla sig allan út svo ég myndi ekki sitjast. Nú er ég því standandi á lokasprettinum fyrir lyflæknisfræðilegt próf sem mun vera afar fyndið í ár skv. manninum sem stjórnar náminu, Runólfi.

Annars hefur Gauti, góðvinur lögreglunar greinilega tekið upp sína illu siði frá forseta Rúmeníu sem er heldur ekki vel við sígauna.
Þeir eru nú nokkuð líkir vinirnir:

.

Smákrimmar Íslands í vondum málum

2007-05-20T09:49:00.000-07:00

Nú er ekki lengur dimmt á Íslandsströndum. Enginn getur flúið líf sitt í skjóli næturs héðan af (þar til í lok ágúst þ.e.a.s.).

Ef einhver sykurpúðinn hefur hug á nammi þá skifar sá hinn sami bara í kommentakerfið og biður um eitthvað því ég sæki Elínu á flugvöllinn í kvöld og get beðið hana um að kaupa allt það sem hugurinn girnist, nema áfengi, allur sá tollur mun nýtast í einkaneyslu við próflok.

Jóel, sem ætlaði að fara með mér til Hróa og Búlgaríu er víst genginn í herinn og hættur í læknisfræði. Hann hefur þó ítrekað óskir um frí í júlí til að komast í ferðina.

Skeleggur spyr sig

2007-05-18T08:32:00.001-07:00

Rættust draumar forfeðra minna. Samfylkingin komin í stjórn. Tími Jóhönnu sigurðardóttur er kominn. Gamlir kratar og kommar aftur hafa snúið aftur. Húrra, húrra, húrra.

Og veðrið, það er glæpsamlegt veður úti, ég að svitna í stuttermabolinn minn í Fármúlanum (Ármúli 30) og það er ekki gott þar sem ég fann ekki holhandarstautinn minn í morgun.

Ég fór til New York City í apríl en aldrei til Kanada. Þar safnaði ég miklum og góðum bjúg vegna bjórdrykkju og kjötáts með miklu magni af kartöfluflögum.

Ég er kominn með vinnu á Landspítalanum sem vinnutík og hlaupari (læknanemi í starfi aðstoðarlæknis). Þar verður lúskrað á andlegu hliðinni minni.

Ég fer líka til Hróaskeldu, 5. júlí en ekki með þessum manni (GRV) sem er ekkert nema dusilmenni og úrkynjað letidýr.

Hann sveik land og þjóð og ætlar að gerast hirðingi í Síberíu og taka með sér sígaunaeitur því honum er illa við þá.

Eftir Hróaskeldu fer ég til Berlínar, þá Prag, Búdapest, Transylvaníu í Rúmeníu og þá Bucharest. Tek svo lest til Istanbúl og þaðan til Eyjahafsins í nokkra daga. Þessi óborganlega ferð verður farin í faglegum áhugamannahópi um ferðalög. Elín verður þar fremst í flokki ásamt Góðum drengjum á borð við Jóel Kristinn Jóelsson og Valentínus Þór Valdimarsson.

Endar sumarið aftur á þeim frábæra stað Landspítala Háskólasjúkrahús (LSH) í mánuð og hefst nám þá aftur á þeim frábæra stað LSH.

Dómsmat

2007-05-08T17:35:00.000-07:00

Sitjandi á afturendanum með þursabit (bæklunarlæknar segja mítu að það sé til) í leðurstól í ákvörðunarkrísu. Pappírsvinna og geðveiki og yfirvinna og álag og ekkert frí og ábyrgð eða næturvinna og lítið álag og lítil ábyrgð og slökun með góðu sumarfríi. Nær sami peningur í báðum tilvikum en ekki sama reynsla. Geðheilsan sirka farin en 4 vikur af lestri eftir. Ef ég tek reynsluna þá er ég líklegur til að missa vitið.

Á pabbi að taka ákvörðunina fyrir mig? Á ég að fara eftir því sem vinir mínir segja? Á ég að hringja í vinalínuna? Skal hafa hlutköst um svona mál? Skal biðja til guðs í svona kringumstæðum?

Lífið er endalaus ákvörðunarkrísa. Sá á völina sem á kvölina.

Já það er ekkert grín að vera til, nýfæddur inn í heim hörkunar og sjúkdóma, greininga og yfirvinnu. Er skrefið stigið til fulls í sumar eða verður 3ja mánaða bið á því?

að forðast stafina

2007-04-28T10:28:00.000-07:00

Ég hef ekki getað skrifað hér á þessa síðu sökum tæknilegra örðugleika hjá google.
Það hefur borið á því að fólk sé hætt að skoða þessa síðu. Þykir mér það miður.
Ég er annars kominn með gikt í vinstri vísifingur, það hættir ekki að braka í honum. Já ég er alltaf veikur, enda er ég í læknisfræði.

Er kominn tími til að hætta að grenja og væla?
Já, fokk já, ég vil ekki heyra meira minnst á stóriðju, banka, viðskiptahalla, kosningar (já hvað er verið að pæla með að hafa það fyrstu frétt eða á forsíðunni skoðanakannanir alla daga, það er kominn tími til að hætta þessu), náttúruvernd, gróðurhúsaáhrifin, hvalveiðar, íslenskan ríkisborgararétt, fjárhagsspár,mál á dagskrá Alþingis. Ég veit um fólk sem notar svona netsíður til að væla, hættið að væla, farið í buksunar ykkar, snúið sokkunum rétt og reynið að gera eitthvað af viti frekar en að væla fyrir framan tölvuna ykkar. Í dag er ekki hægt að komast af í 2-3 klst án þess að heyra eitthvað væl eða lesa eitthvað klósett-tækt efni.

Já ég myndi keyra!

2007-02-14T13:09:00.001-08:00

Talandi um ókeypis grín! Ég hélt mér fast í sófann þegar ég horfði á Kastljós í gærkvöldi endirsýnt klukkan 00:30.
Ungur maður að nafni Andri Freyr Viðarson var fenginn til að drekka bjór og stýra bíl í umferðarhermi. Sýnt var eftir 1. og 2. bjór og svo 5. bjór. Ekki var lögð mikil áhersla á að bjórinn væri 10%. Andri skemmti landi og þjóð í 5-10 mínótur. Mestu mistökin voru að hafa Andra með í viðtalinu eftir 5. bjór þegar spjallað var við Einar Guðmundsson og Andri segir Einari að hann sé boring og slær höndinni að honum til vanvirðingar meðan hann segist ætla að keyra fullur.

Keyrsla : Spóla yfir 3/4 af viðtali

Viðtal: Þetta er óborganlegt

skonsuferskt ár

2007-01-04T03:11:00.000-08:00

Eftir fimm samkundur í heimahúsum á einni nóttu (aðfaranótt 1. janúar) er maður uppgefinn. Nú er bara að hvílast frá öllum þessum gömlu vinum og hitta þá að ári liðnu á sama stað í ca. 30 mínótur.
Ég söng svo hátt í einu boðinu, ég var líka vel í glasi, fólkið hætti að syngja fljótlega eftir að ég gekk inn í sönghópinn. Upp undir morgun var ég kominn svo vel í glas að Gauti, sem var sjálfur orðinn vel fullur benti mér á að nú væri gott að hætta í því áfenga og drekka bara vatn í staðinn. Ég tók orðum Gauta vel, enda er hann atgerfismaður og briller í ýmsum ráðleggingum hvað heilsu og líðan varðar. Gauti er í læknisfræði.
Nú bíður mín fyrirlestur í Háskóla Íslands á morgun þar sem ég fæ að fjalla um PKU (phenílketónúríu) í sjö mínótur. Á orðtakið ,,á sjö mínútum fer enginn fram úr sjálfum sér" því vel við hér. Er þetta allt í tengslum við Ráðstefnu um rannsóknir í líf- og heilbrigðisvísindum.
Kannist þið við Calgary í Kananda? Það gerði ég ekki heldur þar til Elín ákvað að fara þangað að vinna að rannsóknarverkefni. Nú liggur fyrir að ég fari þangað einnig, 2-3 vikur í verknámi tengdu handlæknisfræði (kirugia) kringum páskatíðir.

Í innra eyranu: The Rapture, Pieces of The people we love.

milli tíða

2006-12-30T10:59:00.000-08:00

2006 eða 2007. Er svo sem sama hvor talan er á endanum. Í gær var mikil hátíð, þá tóku sig saman Hildigunnur og Skúli. Samfestingin var frábær, tónlistin í og eftir athöfn góð, ræðurnar hlýjar og kætandi, gott freyðivín á boðstólnum ásamt gnæðar annarra veitinga. Húrra, húrra, húrra fyrir H&S (ehf).
Þá gengum við Elín í fjölskylduboð hjá M&P. Alltaf gaman í samkundum ættarleggs föður míns þar sem fólk er meira en til í að tala um málefni líðandi stundar. Rætt var um skólamál, heilbrigðiskerfið og muninn milli rafeindaverkfræðings og prests. Einar frændi minn var á þeirri skoðun að það væri ekki mikill munur milli þessara tveggja einstaklinga, prests og raf-fræðings, þeir gætu vel gengið til sama klipparans. Alltaf spilað í þessum boðum, sumir verða tapsárir, öðrum þykist standa á sama. Ég vann öll þau spil sem ég tók þátt í (liðið mitt þ.e.a.s.). Allir drukku eitthvað, þeir yngstu jólaöl, þeir eldri rauðvín, bjór, heimabruggaðan bjór, 12 ára gamalt kúbanskt romm. og fleira. Allir kílói þyngri þegar þeir gengu út um dyrnar seinna um kvöldið.
Saddam Hussein bara orðinn píslarvottur í dag. Ég mæli því með bókinni "Píslarvottar nútímans" eftir Magnús Þorkel Bernharðsson í tilefni dagsins.
Þessa dagana er ég andvaka ásamt allri þjóðinni af öllum líkindum sökum biðar eftir frétta-annálum ársins 2006. Og hvernig verður skaupið? Ég gafst upp á skaupinu í fyrra, ég ætla frekar að setja "Curb your Enthusiasm" í DVD spilarann til að kveðja 2006 með gleði í hjarta.

-Í innra eyranu: The Annuals, platan Be He Me; Professor Murder, platan Professor Murder Rides the Subway; Jay Dee, platan The Shining
-Á sjónhimnunni: Öxin og Jörðin eftir Ólaf Gunnarsson og Skáldalíf eftir Halldór Guðmundsson.

TFGÁ og MÞNBYLÍSS

Hátíðarskap

2006-12-25T09:19:00.000-08:00

Gleðilegar heilagar tíðir. Megi guð og aðrar vættir vera ykkur hliðhollar á komandi blessuðum tíðum. Megi pakkinn vera með ykkur eins og ég sagði við frænda minn í gær. Hann hefur þegar sýnt mér mátt sinn, ég fékk nær allt sem ég gat hugsað mér að fá. En ég fékk þó mun færri jólakort, aldrei fengið jafn fá jólakort. Þegar ég var á leikskóla fékk ég fullt af kortum eftir litlu jólin þar á bæ. Áður en ég komst á stofnana-aldur var mér einnig óskað gleði í kortum til m&p. Nú er ég fluttur að heiman, engin lítil jól handa mér og ég enda í íbúðinni minni uppfullur af veraldlegum gæðum.
En aðfangadagur var ánægjulegur. Rjúpnabragðið lék vel við bragðlaukana fremst á tungubroddinum og hliðlægt á tungunni, þar eru villibráðar-bragðlaukarnir. Miðnæturmessa í Dómkirkjunni var ágæt, Rás 1 jólalagið var frumflutt af mikilli snilld og biskup Íslands talaði um baggalút, fór með texta eftir þá sí og æ.

GJ+FKÁ

Helgin sem kom aldrei

2006-12-08T10:19:00.000-08:00

Ég er á leiðinni til Akureyrar. Það er bær á Norðurlandi. Hann er víst kallaður höfuðstaður Norðurlands, a.k.a. Bangkok norðursins.

Facta:
-Fjöldi þeirra sem hýrast á götum Akureyrar eru rétt rúmlega 10000 talsins, ef ólöglegir innflytjendur frá Asíu eru ekki taldir með
-Fyrrverandi Bæjarstjóri Akureyrar heitir Kristján Þór Júlíusson og núverandi eða tilvonandi (mér er svo sem sama, þau eru bæði afleiður Tilbura bláa einkavæðingaflokksins) nefnist víst Sigrún Björk Jakobsdóttir) en hún bjó lengi erlendis og lærði til Hótelreksturs
-Það eru nokkrar kirkjur í bænum
-Spítalinn á svæðinu nefnist Fjórðungssjúkrahúsið á Akureyri (FSA) og aðalinngangurinn er nefndur B-inngangur
-Ég mun halda til á FSA í tvær vikur vegna handlæknislegrar verkmenntunar
- Ég fer á bíl og sendi snjóbrettið með flugvél. Ég fer á snjóbretti en geri ekki Backflipp þar sem ég komst að því að bakið getur endað svona ef ekki tekst nógu vel til:

Hér sjáum við klassískt tilfelli af bakmeiðslum sem nefnist:

Flexion-Distraction injury

Já ég á engar helgar eftir til að njóta, ég er alltaf að nota tímann í eitthvað annað en njóta stundanna sem koma á milli virkra daga. Ég hef ákveðið að rísa upp gegn gerfiannasemi minni og fá mér aðeins í tánna í kvöld. Það er hægt að finna mig á DOMO, nýja staðnum áÞingholtsstræti þar sem sportbarinn var áður til húsa, skáeygðan, gleiðsporandi og brosandi.

Tundur og tól

2006-12-06T11:47:00.000-08:00

Manstu eftir rjómabollufaraldrinum? Ég man ekki eftir honum en ég var að lesa mér til um hann. Þá fékk einhver sem þú þekkir líklega og er sólginn í rjómabollur Salmonellusýkingu. Við erum að tala um 2-3% líkur á liðbólgu hjá þessum einstaklingi (Reiter´s syndrome).

Sástu tunglið í dag? Ég sá það, fullt og girnilegt.

Það varð að gerast einhverntíma. Það gerðist í fyrradag. Ég fór í nýju IKEA búðina sem er svo langt í burtu að vegalengdin samsvarar allri Manhattan eyjunni að lengd. Jæja ég tók með mér úr búðinni tvo stæðilega standlampa. Ég fjárfesti einnig í koddum, pottum og pönnum, jólapappír og einhverju fleiru sem er svo ómerkilegt að ég man ekki hvað það er. Jú, hringlaga baðmotta í orange lit var það, afar smekkleg. En ekki fara í búðina að óþörfu. Þú verður að labba allan hringinn, ert fastur í upphafinu á löngum hring sem þú verður að keyra þig í gegnum. Lyftan er bara með takka til að fara upp en ekki niður uppahafsmegin svo þú verður að gjöra svo vel að taka þig á og leggja af stað hringinn til að komast hinumeginn að lyftunni og fara niður. Ég sá enga brunaútganga á leiðinni. Ég tók eftir þessu því ég fór út um slíkan í hollenskri IKEA búð og öll verslunin pípti digrum karla rómi: Veúúú, veúúú, veúúú. Annars væri ég ekki til í að láta hlera símann minn því þá ætti ég ekki mörg leyndarmál til að leyna öðrum. Þá gæti það líka endað illa. Það yrði eitrað fyrir mér á endanum. Ég nefnilega hef ekki mikla trú á stjórnvöldum í Rússlandi.

Í innra eyranu: Joanna Newsome, Ys sem og The Milk-Eyed Mender.
Á sjónhimnunni: In Cold Blood (Truman Capote) og Konungsbók (Arnaldur Indriðason)

KEF-Frankfúrt-Ludwigshafen-Heidelberg-Ludwigshafen-Frankfurt-Köben-KEF

2006-12-02T15:19:00.000-08:00

Ég er kominn aftur frá Ludwigshafen. Og hvað græddi ég á þessari ferð minni? Ekki pening get ég sagt ykkur. Ekki visku get ég sagt ykkur. Ekki aukna orku get ég sagt ykkur. Ég er búinn að vera með pest í nokkrar vikur núna. Ég gaf skít í veikindin þegar ég fór út, drakk mikið af bjór og borðaði óhollan mat, svaf óreglulega og lék, dansaði og söng á sviði fyrir Þjóverja eins og vitlaus maður.

Karl Erlingur hefur tekið sótt til 4. vikna og hefur hugsað sér að ganga til læknis fljótlega. Sá gangur verður ekki langur þar sem ég eiði nú þegar stórum hluta lífs míns þar. Í gegnum síðustu ár hefur mig grunað að ýmsar sóttir hafi verið að plaga mig, eins og heilaæxli, psoiriasis, lifrarbólga, ofnæmi í öllum sínum myndum og allt sem nöfnum er hægt að nefna. Maður fær nefnilega flest það sem maður les um. Nú grunar mig að ég sé kominn með berkla þar sem ég var að vinna á smitdeild um daginn og til eru dæmi þess að læknanemar hafi smitast af berklum á spítalanum.

Ég upplifi nú í miklum mæli nætursvitaköst, vægan hausverk, minnkaða orku og stöðuga þreytu, verki í öllum líkamanum og einskonar dofa. Ég get ekki einbeitt mér, ég get ekki farið að hreyfa mig, ég er bara í ruglinu.

Þó getur þetta bara allt verið í hausnum á manni og verið orskað af streitu, það segir faðir minn alla vega og hann er sálfræðingur.

Jæja, Þýskaland var afar fínt, bærinn Heidelberg er stórkostlegur, kastali, hús frá miðöldum, steinilagðar götur sem Goete, Schiller, Wagner og Mann hafa líklegast gengið eftir. Myndir af þessu seinna. Núna er ég farinn upp í rúm til þess að vera veikur.

Þessi vika, þetta líf

2006-11-20T09:10:00.000-08:00

Hvað er ég að segja með titli þessara skrifa?
Lífið er orðið að vikum í huga mínum. Allar vikur keimlíkar, ég er farinn að drekka sama kaffið á sama stað á sama tíma alla daga vikunnar. Sama bragðið og sama lyktin í loftinu. Eini munurinn á vikunum er sá að ég er á mismunandi deildum Landspítalans. Melting, smit, öldrun, röntgen og bráðamóttaka. Þetta er fjölbreytileikinn í lífi Karls Erlings Oddasonar Billich. Nei haha, ég fer í World Class 3x á viku, hlaupandi eins og afhausaður kjötskrokkur á færibandi með sjónvarpið speglandi viðbjóð lífsins í hvítu augans.

Sufjan Sykurmoli:
Allir lífsins tónleikar freistuðu mín ekki þessa vikuna, þ.e.a.s. ég fékk ekki miða eða átti ekki pening fyrir honum. Ég er að spara illmenninguna, ég er á leiðinni til Ludwigshafen í Þýskalandi. Eins og þú veist eru Þjóðverjar mikið fyrir að drekka bjór, stofna til styrjalda, spara samt pening og halda öllu í röð og reglu í kringum sig. Ég er mest hrifinn af bjórmenningunni og læt önnur áhugamál þeirra að mestu óhreyfð nema Bauhaus stefnu þeirra í arkiterkúr og listum, uppáhaldsstóllinn minn í æsku var skapaður undir áhrifum þeirrar stefnu.

Ég er því dottinn út til Ludwigshafen næstk. Föstudag. Þar mun ég slá í gegn á tveimur sýningum Woyzeck. Það er einhver leiklistarhátíð í gangi. Ég er 3. gaurinn frá vinstri með sólgleraugun í söngatriðinu þegar kapteinninn mætir til leiks, dinglandi úr loftinu.
Það veit samt enginn hvar Ludwigshafen er þó hún sé við bakka Rínar rétt rúmlega stærri en Reykjavík. Þessi borg er tilvalinn upphafsstaður leiðangra inn í Svartaskóg eða vínhéruð SV-Þýskalands.

Ég lifi þótt ég sé 100% viss um að Golfstraumurinn sé alveg horfinn okkur sjónum hér á landi bændaflokksins og mjólkurkvóta. Kannski kem ég ekki heim 29. nóvember.

Um hvað

2006-11-17T11:11:00.000-08:00

Ég var að velta því fyrir mér um daginn hvað væri skemmtilegt. Er ég skemmtilegur? spurði ég sjálfan mig. Eru félagar og aðstandendur skemmtilegir? spurði ég sjálfan mig.

Kunningi sagðist ekki hafa þekkt mig um daginn því ég var svo rólegur. Ég var að gera teygjur á gólfinu í ræktinni. Ég var þó ekki ofvirkur í æsku, ég hafði aðeins mikla orku í æðunum. Ég veit í dag að ég á það til að vera svolítið órólegur. Þegar ég hef sofið lítið verð ég stundum svolítið skrítinn, stúlka sagði mig vera í steikhúsinu um daginn.

Hef ég valið fólkið í kringum mig eða hafa óhjákvæmileg félagstengsl valið mig sem föruneyti einstaka samtíðarmanna minna? Höfum við uppi svokallað nauðungarsamband á milli okkar þar sem aðstæður neyða okkur til samskipta eða afskipta af hvor öðrum (kk þar sem allir eru menn)?

Upplýsingar sem koma þér ekki að gagni:
1) ég losna ekki við táfýluna sem er að plaga mig . Ég hef heyrt gott húsráð, setja lítra af AB mjólk í skál og stinga fótunum ofan í og hlada þeim þar í einhvern tíma. Þá er líka hægt að nota kuldan sem er úti núna, ganga berfættur eftir fremsta megni úti því kuldinn á víst að drepa helvítis sveppina
2) Það var stolið þvottavél í vesturbænum og mig vantar einmitt núna þvottavél
3) Það var rafmagnslaust í vinnubúðunum við Kárahnjúka en þeir styðjast einmitt við díselvél til að mynda rafmagnið
4) Hvort verið sé að gefa stjörunur á fimm skala eða fjórir skala í Fréttablaðinu hef ég ekki hugmynd um
5) Ég er á vakt meðan aðrir heilvita menn eru í vísindaferð í maga skattkonungs íslands, höfuðstöðvum KB banka

Kl. 14:34 á föstudegi barst mér bréf

2006-11-11T06:13:00.000-08:00

Ég var veikur í síðustu viku, þrjá daga í röð. Ég á að hringja til einstaklings á spítalanum til að tilkynna veikindi mín alla dagana. Hann er aldrei mættur fyrr en rétt fyrir 9:00 í símann og er ekki alltaf við. Nú er mér sagt að ég eigi að skila veikindavottorði inn ef ég er veikur í meira en einn dag. 95% mætingaskylda er á verklega lyflæknisfræði. Ekkert nema ágætt um það að segja.

Ég var að vinna á Smitsjúkdómadeild og verð því líklega eitthvað veikur á tímabilinu (kannski ekki?).

Á ég þá að biðja sérfræðinginn á deildinni um veikindavottorð? Á ég að biðja bekkjarfélaga minn um að skrifa vottorðið fyrir mig? Á ég sjálfur að skrifa það? Eða á ég að hringja í ritara heimilislæknisins sem ég er hjá og segja að ég þurfi veikindavottorð fyrir þessa þrjá daga en borga í staðinn 1500 kr. Er mér ekki treyst til að meta mín eigin veikindi en sjá síðan sjálfur um veikindi annarra?

Ég mun þurfa að taka verklegt og skriflegt próf í þessum fræðum þótt ég sé veikur í þrjá daga eða meira.

Og enn að þjóðarmálum

2006-11-09T11:58:00.000-08:00

Má ekki tala um innflytjendur? Verðum við að sneiða fram hjá umræðunni um nýlendudjáknana og pukrast með lagakrókana, hver í sínu horni? Annars er ég á því máli að varlega verður að fara að þessu umtali, ekki fella einhverja dóma í hugsanaleysi og átta sig á því að útlent vinnuafl er ein stoð hagvaxtarins síðustu misseri.

Og þá að BNA. Hvenær? var bara spurningin varðandi uppljómun bandarísku þjóðarinnar (50% þeirra sem eru á kjörskrá, við tökum ekki með ólöglega innflytjendur) um illt stjórnarfar landsins. Donald Rumsfeld látinn fara, við sjáum ekki mikið af honum héðan í frá. Ég efast samt um Robert Gates, sem er einn af höfuðpaurum homeland security en sú stofnun ber hvað mest ábyrgð á mannréttindabrotum sem Bush stjórinin hefur verið að fremja síðustu ár. Því held ég að Nancy Pelosi sé gott afl á vogarskálar mannréttinda í BNA sem og víðar í heiminum.

Annars afsaka ég þetta pólitíkusa kjaftæði, ég hugsa ekki mikið um þetta en það hefur ekki verið mikið að gerast á nýliðnum tímum hjá mér. Námið hefur formlega kæft sjálfið hjá mér, ég er bara innantómur læknanemi sem veit ekki neitt og virðist oft bara vera fyrir á spítalanum. Ég segi oftast þar sem maður á til að gera gott handtak sem reynist þarft og koma með markverðar ályktanir um meðferð.

Ég vona að þið fjúkið ekki í vonda veðrinu í nótt!

Úr háloftum heimsins

2006-11-05T07:23:00.000-08:00

Svo við skiptum núna um málefni, má nokkuð bjóða þér kaffi?
Já takk, gjarnan. Ertu búinn að fara á listasýninguna á Listasafni Íslands um málverkið á Íslandi eftir 1980?
Ha nei ég er ekki enn búinn að fara.
Þannig að þú ætlar að fara?
Já ég held það! Hvað má bjóða þér í kaffið?
Áttu nokkuð klasasprengjur?
Ha nei því miður en ég á úran með vott af N-kóreu og Ísrael-keim.
Nei sama og þegið, ég tek það bara svart.

Þegar ég man

2006-10-27T15:28:00.000-07:00

Ég man þegar allir áttu eins síma. Allir tóku upp símann sinn þegar einhver hringdi í þá. Ég notaði hringitón kenndan við Jumping, það voru margir aðrir með þennan hringitón líka.

Núna eru allir með eitthvað víðóma, fjölrása, ógeð. Sumir eru snjallir og taka upp sína eigin rödd eða sitt uppáhaldslag.

"Gauti? Gauti? Druslastu til að svara í símann, þetta gæti verið mamma þín" eða eitthvað þvíumlíkt.
En ég ber ekki sama húmor og allir, hvað þá tónlistarsmekk.
"Halló Jóhann, svaraðu áður en það er of seint, ég tel upp að 10 (allir vita að ef maður er með frelsi skellir línan sér inn í talhólfið eftir 14 sekúndur). 1, 2, 3, 4, 5, 6, 7, 8, 8, 9 og 10. hahahaha" eða þá lag með einhverju meinstrím kjaftæði. Já ég verð því bara að sætta mig við að dæma fólk út frá hringitónum þeirra.

Kannski þetta hjálpi bara til, sjá það fólk sem ég vil ekki hafa samskipti við.
Takk Japan og Indland, fyrir svona frábæra og skjóta þróun á hringitónum.

Annars er hringitónninn minn "in da club" með 50 Cent, dæmi hver sem dæma vill.

tennis

2006-10-18T16:21:00.000-07:00

Það var verið að segja mér að bloggið væri leiðinlegt.

En ég lenti í afar skemmtilegu tilviki um daginn.

Ég var að kaupa borðtenniskúlur í Útilíf.

Ég: Afsakið en hvar eru borðtenniskúlurnar?
Afgreiðslukona: þarna við skódeildina
Ég:Ha, í skotdeildinni?
Afgreiðslukona:Já í skódeildinni
Ég:Nú ókei, haha.

Þarna hlæ ég í endann þar sem mér finnsta afar fyndið að það skuli vera búið að sérflokka borðtenniskúlur svona nákvæmlega. Ég hef fengið fast smash í augað og í testis þannig að ég varð að vera sammála þessari flokkun. En það var ekki skotdeild í þessari Útilífsbúð. Ég þurfti því að lokum að átta mig á þessum misskilningi af sjálfsdáðum og biðja skósöludreng um aðstoð. Ég var því 3-5 mínótum of lengi að kaupa borðtenniskúlur og afsaka því hér með seinkomu mína í heim hinna hugsandi manna.

Glósa

2006-10-02T13:40:00.000-07:00

þetta er komið í gagnið, ekki sagt að þessi síða muni umbreyta heiminum en hver veit nema það umbreyti mér og kannski einhverju smá hjá þér ef eitthvað vitrænt kemur fram úr fingurgómunum á mér næstu mánuðina.

Annars er ekki vonast eftir miklu á þessari síðu!